Our next event will be in

JavaScript either reported a fatal error or is not running.
loader

Գեղեցկուհին և Հրեշը, բռնության 50 երանգները

Ընդունված է համարել, որ «Գեղեցկուհին և Հրեշը» հեքիաթը նրա մասին է, որ արտաքինը ամենակարևորը չէ, այլ կարևոր է այն, ինչ կա մարդու ներսում: Սակայն արդյո՞ք մուլտֆիլմի հերոսները իրոք փորձում են փոխանցել այդ հաղորդագրությունը մուլտֆիլմի ընթացքում: Կարծում եմ, որ այս հեքիաթը շատ լավ ցուցադրում է այնպիսի մի երևույթ, որն է բռնության և հատկապես ընտանեկան բռնության ռոմանտիզացիա:

«Կարդալը կնոջ համար չէ, նա դրանից հետո սկսում է մտածել», -ասվում է մուլտի հերոսներից մեկի կողմից:

Բռնության ամենավառ արտահայտված հատկանիշներից մեկն էլ այն է, որ դրան ենթարկված կինը հաճախ փորձում է արդարացնել բռնարարին, իսկ բռնարարն էլ իր հերթին փորձում է տարբեր ժեստերի, նվերների միջոցով «շահել» տուժածի սիրտը: Այդպես է լինում նաև այս մուլտֆիլմում, երբ Գեղեցկուհու և Հրեշի միջև ծագած լուրջ վիճաբանությունից հետո, երբ հրեշը քանդում է ամբողջ պալատը և իր վարքով վախեցնում թե՛ Գեղեցկուհուն, և թե՛ պալատի աշխատողներին, նա Գեղեցկուհուն նվերներ է անում: Ամբողջ մուլտֆիլմի ընթացքում մենք կարող ենք տեսնել, թե ինչպես է Բելը (Գեղեցկուհին) ամեն կերպ արդարացնում Հրեշի ագրեսիվ վարքը, որը ի դեպ բռնության ենթարկվող կանանց կողմից կիրառվող հնարք է, որով նրանք փորձում են տեսնել ամեն երևույթի մեջ դրական կողմեր ինչն էլ թույլ է տալիս ժամանակավոր լավ զգալ: Այս մուլտֆիլմի հաջորդ մասերում կարող ենք տեսնել, թե ինչպես է Բելը անընդհատ փորձում փոխել և «դաստիարակել» Հրեշին, չնայած նրան, որ Բելը իր երգերում հաճախ է խոսում այն մասին, որ ուզում է կրթվել, ճանաչել աշխարհը ու արկածներ ունենալ, իսկ ամուսնությունը և պալատում փակվելը նրա համար չեն: Մուլտֆիլմի հիմնական հաղորդագրությունն այսպիսով դառնում է սա. «Դու իհարկե կարող ես լինել տգեղ և անտաշ, բայց եթե դու տղամարդ ես: Եթե դու կին ես, ապա պետք է լինես գեղեցիկ, խելացի, սիրալիր և համբերատար»:

Առաջին հայացքից կարելի է ասել, որ սա ուղղակի հեքիան է: Այո, բայց հենց նման հեքիաթներն են սովորեցնում աղջիկներին, որ նրանք պետք է փոխեն և վերադաստիարակեն իրենց բռնարարին: Հազարավոր աղջիկներ հարաբերություններ են ունենում և ամուսնանում են այն հույսով, որ իրենց զուգընկերը կփոխվի: Հազարավոր կանայք չեն հեռանում, քանի որ կարծում են, որ իրենց հրեշը կդառնա իսկական արքայազն, եթե նրան շատ սիրես և նրա մասին շատ հոգ տանես: Սակայն կյանքում նման հեքիաթները հազվադեպ են դրական վերջաբան ունենում: Այս մուլտֆիլմերը ցույց են տալիս կնոջ վարքի ընդունելի մոդելը, որը տպավորվում է փոքրիկ աղջիկների ենթագիտակցության մեջ և դառնում վարքի ձևավորման հիմք:

Կարող ենք քննադատական հայացք գցել նաև դիսնեյան մյուս մուլտֆիլմերին: Օրինակ «Քնած Գեղեցկուհին» մուլտֆիլմը, որտեղ գլխավոր հերոսը՝ Ավրորան, իր ծնվելու օրվանից սկսած պետք է ամրապնդի իր ընտանիքի քաղաքական հայացքները: Պետք է սպանվեր մեկ այլ կնոջ կողմից, սակայն նրան փրկում է արքայազնը՝ համբուրելով նրան: Նրա համար փրկությունը ևս իր գեղեցկության և սեռականության մեջ է:

Սպիտակաձյունիկը: Նրա ձևավորվող սեռական գրավչությունը վտանգ է հասցնում մեկ այլ կնոջ, ով նրան սպանում է: Վերջում կփրկվի իր միակ ռեսուրսի՝ ֆիզիկական գեղեցկության շնորհիվ:

Ջրահարսը: Ռադիկալ կերպով փոխում է իր արտաքինը, որպեսզի դուր գա արքայազնին, չնայած նրան, որ այդ ամենի շնորհիվ կորցնում է խոսելու հնարավորությունը: Վերջում մահվանից նրան փրկում է արքայազնը:

Մոխրոտիկը: Կյանքի դաժան պայմաններից նրան փրկում է արքայազնը և ոչ թե նրա համար, որ Մոխրոտիկը աշխատասեր է, նպատակասլաց կամ իմաստուն, այլ նրա գեղեցկության համար:

Հետաքրքիր է նաև այն հանգամանքը, որ դիսնեյան մուլտֆիլմերում կանայք իրենց արտաքին տեսքով շատ նման են, նույնիսկ կա մի ուսումնասիրություն, որի շրջանակներում ուսումնասիրվել են դիսնեյան կին հերոսների արտաքին տվյալները և եկել են այն եզրակացության, որ նրանք շատ քիչ են տարբեր: Մարմնի, աչքերի, գլխի կառուցվածքը լռիվ նույն են, հագուստը՝ զգեստներ, շրջազգեստներ, զարդեր: Սա խոսում է այն մասին, որ դիսնեյան մուլտֆիլմերը չեն ցույց տալիս այն իրական բազմազանությունը, որը կա կանանց մեջ: Բազմազան են ներկայացված հիմնականում բացասական կերպարը, ինչն էլ հաճախ հենց ստիպում է երեխաներին կարծել, որ բազմազանությունը դրական երևույթ չէ, որ կա գեղեցկության մեկ նորմ, որը ընդհանուր է բոլորի համար, որ այդ չափանիշին չհամապատասխանելը քեզ դարձնում է տգեղ և պակաս կարևոր:

Հեղինակ՝ Արմինե

Search

Follow us

Coming Events

Mar
28

06:00 28.03.2017 - 03:00 01.04.2017

© 2001-2016 Society Without Violence. All Rights Reserved.